Cofrestrwch ar gyfer ein cynllun pasbort Llwybr Dyffryn Gwy a gallwch hawlio eich tystysgrif swyddogol Llwybr Dyffryn Gwy gyda bathodyn pan fyddwch yn cwblhau'r daith gerdded. Casglwch stampiau digidol ar eich ffordd wrth i chi gwblhau bob rhan, nid dim ond pan fyddwch yn croesi'r ffin rhwng Cymru a Lloegr! Mae'n ffordd hwyliog o gofnodi'r milltiroedd a chadw hanes eich taith.
Roedd ein cerddwr hynaf i dderbyn eu pasbort Llwybr Dyffryn Gwy ymhell yn eu 80au. Rhoesom dystysgrif hefyd i gi annwyl o'r enw Jack, wedi iddo gerdded, nofio a mynd mewn canŵ ar yr Afon Gwy o'r tarddle i'r môr gyda'i berchennog, yr ymgyrchydd a'r hyrwyddwr afonydd Angela Jones.
Ar ddiwedd pob cam byddwch yn gweld un o'r arwyddion hyn lle gallwch sganio cod QR, a fydd yn dangos eich bod wedi cwblhau'r rhan honno o'r daith gerdded. Bydd eich pasbort digidol yn cael ei stampio'n awtomatig. Byddwch yn gweld arwyddion fel hwn yn ffenestr/drws siopau, caffis, tafarnau, lletyau gwely a brecwast, atyniadau i dwristiaid neu ganolfannau croeso yn yr ardal leol. Mae rhai i'w cael ar hysbysfyrddau mewn pyrth eglwysi. Maen nhw i gyd yn hygyrch unrhyw bryd, felly does dim rhaid i chi boeni am gyrraedd ar ôl oriau. Mae disgrifiad o'r lleoliadau i gyd yn y disgrifiad llwybr ac maen nhw wedi eu marcio ar fap y daith yma. Mae 17 stamp i'w casglu i gyd a byddwch angen o leiaf 12 i hawlio eich bathodyn a'ch tystysgrif. Nid oes signal ffôn symudol ym maes parcio Rhyd-y-benwch (dechrau/diwedd y Llwybr), felly tynnwch lun ohonoch eich hun a'i lanlwytho i hawlio eich stamp ar gyfer y rhan honno o'r daith gerdded.
Yn syml iawn, gallwch ddefnyddio camera eich ffôn i sganio'r cod QR a chewch eich cymryd yn awtomatig i'r dudalen basbort ar ein gwefan.
Cofrestrwch cyn i chi ddechrau eich antur er mwyn i chi allu dechrau casglu stampiau ar unwaith.
Byddwn yn parhau i gyflwyno tystysgrifau a bathodynnau i bobl sydd wedi bod yn casglu stampiau pasbort ffisegol, ond cofiwch fod llawer o leoliadau stampio pasbort wedi cau yn ystod y cyfnod clo ac nid ydynt yn gweithredu bellach. Dyma pam rydym wedi lansio'r pasbort digidol newydd. Os gallwch, tynnwch lun a'i atodi gyda'ch cais am basbort, ond peidiwch â phoeni os oes gennych unrhyw fylchau, byddwn yn dal i gyhoeddi tystysgrifau a bathodynnau.
